“ELS” təşəbbüsü və maliyyə dəstəyi ilə ilk dəfə olaraq  “Bənövşə” Uşaq Xorunun ifasında səsləndirilən Azərbaycan Respublikasının Dövlət Himni ilə başlayan tədbir “ELS” Müstəqil Araşdırmalar Mərkəzinin rəhbəri İradə Yaqubovanın çıxışı ilə davam etdi. Onun sözlərinə görə, 2011-ci ilin fevral ayında ELS-in “bəstəkar və şairlər, xüsusən də gənc bəstəkarlar arasında uşaq mahnılarının bəstələnməsinə marağın artması məqsədilə uşaq mahnısı müsabiqələri təşkil edilməli, qalib mahnılar isə disklərdə buraxılmalıdır” təklifindən irəli gələn təşəbbüs 2 ildən sonra real işlə nəticələndi. ELS 2013-cü il iyunun 1-dən Azərbaycan Prezidenti yanında QHT-lərə Dövlət Dəstəyi Şurasının maliyyə dəstəyi ilə “Gənc nəslin mədəni-mənəvi inkişafının dəstəklənməsi” layihəsi çərçivəsində “Yeni uşaq mahnıları-2013”  Ümumrespublika Müsabiqəsi elan etdi.

İ.Yaqubova dedi ki, “Yeni uşaq mahnıları-2013” Ümumrespublika Müsabiqəsi Azərbaycanın tarixində ilk dəfə olaraq 2013-cü ildə Azərbaycan Respublikası Prezidenti yanında QHT-lərə Dövlət Dəstəyi Şurasının maliyyə dəstəyi ilə “ELS - Müstəqil Araşdırmalar Mərkəzi” İctimai Birliyi tərəfindən keçirilmişdir. “Bundan dərhal sonra layihənin davamı kimi biz «Azərbaycanın mədəni irsinin qorunması və inkişafına dəstək» layihəsi çərçivəsində «Yeni uşaq mahnıları-2013» Ümumrespublika Müsabiqəsinin qalib mahnılarından ibarət disklərin buraxılışı və notların dərcini reallaşdırmaq üçün Azərbaycan Respublikasının Prezidenti yanında Qeyri-Hökümət Təşkilatlarına Dövlət Dəstəyi Şurasına müraciət etdik və layihəmiz 217 qalib QHT-lər arasında yer aldı. Bu gün uşaq yaradıcılıq mərkəzləri və Bakı şəhəri orta təhsil məktəblərinə payladığımız not albomuna müsabiqədə ilk 15 yeri tutan mahnıların notlarını daxil etmişik” - deyə  o, tədbir iştirakçılarına müraciət etdi. İ.Yaqubova uşaqlarımızın zövqunü oxşayacaq yeni mahnıların ərsiyə gəldiyini və gələcəkdə də bu istiqamətdə Mərkəzin fəaliyyətinin davam edəcəyini vurğuladı.

Tədbirdə Azərbaycanın xalq artisti, bəstəkar Oqtay Zülfüqarov, Azərbaycan Dövlət Konservatoriyasının elmi işlər üzrə prorektoru Gülnaz Abdullazadə, Bakı Musiqi Kollecinin rektoru Nazim Kazımov, əməkdar incəsənət xadimi, rejissor Şeyx Əbdül Mahmudbəyov və digər tanınmış incəsənət xadimləri təbrik və tövsiyyələri ilə çıxış etdilər. 

Uşaq yaradıcılıq mərkəzlərinin rəhbərləri və Bakı şəhəri orta təhsil məktəblərinin təmsilçılərinin iştirakı ilə keçirilən təqdimatda aidiyyətli rəsmi qurumların təmsilçiləri, görkəmli mədəniyyət, elm və incəsənət xadimləri, yerli QHT-lər, beynəlxalq təşkilatlar və KİV nümayəndələri də iştirak etmişdir.