Konserti bəstəkarın piano üçün “Yuxu” pyesi ilə nəticəsi Əfrasiyab Məmmədov açıb. Sonra O.Zülfüqarovun “Trio”, Simli Kvartet №2, Məhəmməd Füzulinin 400 illik yubileyinə həsr etdiyi “Yad eylərəm” romansı, violonçel və piano üçün “Muğam və rəqsə dəvət” pyesi və digər əsərləri peşəkar musiqiçilər tərəfindən ifa olunub.
Oqtay Zülfüqarovun oğlu, əməkdar incəsənət xadimi, bəstəkar Cahangir Zülfüqarov Azərbaycan Bəstəkarlar İttifaqına konsertin təşkilinə görə minnətdarlığını bildirib.
Qeyd edək ki, mayın 31-də bəstəkarın doğum günündə Azərbaycan Dövlət Akademik Filarmoniyasında 90 illiyinə həsr olunmuş yubiley gecəsi keçirildi. Azərbaycan Dövlət Simfonik Orkestrinin (bədii rəhbər və baş dirijor Rauf Abdullayev) ifasında bəstəkarın simfonik, instrumental və kamera əsərləri səsləndirildi.
İyunun 4-də isə Azərbaycan Dövlət Akademik Musiqili Teatrında Oqtay Zülfüqarovun uşaq mahnılarından ibarət “Şənlən, mənim xalqım” adlı qala-konserti keçirildi. Bir çox nəsillər tərəfindən sevilən və bu gün də aktuallığını itirməyən mahnılar tamaşaçılara yeni aranjemanda təqdim olundu. Anşlaqla keçən konsert Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə ELS Müstəqil Araşdırmalar Mərkəzinin “Mədəni-mənəvi irsimizin qorunması və təbliğinə ictimai dəstəyin təşkili” layihəsi çərçivəsində təşkil olunmuşdur.