ƏNƏM

Dayanmısan qarşımda

Vüqarlı bir dağ kimi.

Saçların ağarıbdır

Dağ başında qar kimi.

İşıq saçar hər yana

Günəş çıxdığı zaman.

Sənsə şəfəq saçırsan

Bərq vuran günəş kimi.

Gecələr göy üzünü

Aydınlatan aydırsa,

Sən aydan da nurlusan,

Mənimçün nur saçırsan!

GÜLNAZ NƏNƏM

Evimizin bəzəyisən

Şəkərdən də şirinsən.

Sən mənim bir dənəmsən

Ay mənim Gülnaz nənəm!

Gül kimi ətirlisən,

Nazlısan, qəmzəlisən,

Ayımsan, günəşimsən,

Ay mənim Gülnaz nənəm.

Evimizdə böyüksən,

Amma uşaq kimisən.

Sənə söz demək olmur

Hər şeydən inciyirsən

Ay mənim Gülnaz nənəm.

QƏHRƏMAN OLUM

Ağatlı oğlan, Cırtdan,

Məlikməmməd, İsgəndər

Nağıl qəhrəmanları,

Dillər əzbəridirlər.

İstəyirəm mənim də

Adım gəzsin dillərdə.

Mən də olum qəhrəman

Yaxşı əməllərimlə!

Haqqın yoluyla gedim,

Xeyirxah işlər görüm.

Qeyrətli oğlan kimi

Hər zaman yadda qalım!

YOLLARDA OL DİQQƏTLİ

Bircə an beynimdən çıxara bilsəm

Qara xəbər gələn dəhşətli anı.

Ürəyim dayandı, dondu qanım da

O acı xəbəri eşidən vaxtı.

Qəzaya uğradı gül balam mənim

Daha bitməz bağda gülüm, çiçəyim

Gül-çiçək olmasa bülbül də ötməz

Bülbülü susduran gözəl mələyim.

Sükan arxasına keçən sürücü,

Nə olar yollarda ol sən diqqətli!

Yaddan çıxarma ki, ömür qısadır.

Allahın verdiyi can əmanətdir!

Ana Vətən!

Ana! Bu adın mənası dərin,
Ana! Söylədikcə döyünür qəlbim.
Mən dil açanda "Ana" söylədim
Bu sözü vətənimlə bir qoşa çəkdim!

Vətənim Ana Vətən, söyləyirəm mən!
Vətənini sevirsən, anan kimi sən?
Əgər sevmirsənsə aç qulağını,
Dinlə bu Azərbaycan vətəndaşını!

Öyünmə ki, Azərbaycan vətəndaşısan,
Dilini, dinini sevməyirsənsə.
Anan böyüdüb ki, əsgər olasan,
Vətənin keşiyində ər tək durasan!

Koroğlunun, Babəkin göz bəbəyi bu

Tapdaqlar altında olan bu torpaq.
Babaların bizlərə əmanətidir
Qızıl sərvətlərlə dolan bu torpaq!

Hörmətli gözəl atam

Sən bizimçün əzizsən.

Yaşayıb, yaşadırsan

Hörmətinlə bizi sən.

Sən bizə can deyəndə

Sevinir ürəyimiz.

Anam, anam, can anam,

Gülür daim üzümüz.

Yurdumun mərd oğulları

Həcər kimi qızları var.

Hər birinin ürəyində

Tükənməyən arzusu var.

Vətən doğmadır bizə

Ömrümüzə bəzəkdir.

O hər şeydən üstündür

Hamımıza gərəkdir.

Azərbaycan! Sən mənim qəlbimsən,

Gözümün nurusan, sevincimsən.

Həyatda anam kimi əzizsən

Hər şeydən dəyərli bir incisən.